كل عام والجميع بخير والله يتقبل مننا ومنكم الصيام والقيام والدعاء امين

كنت طول السنين الماضية اشتكي من ضيق الوقت وتزاحمه

واني انشغلت بالانترنت عن القراءة من يوم دخلت الثنوي

وكل يوم اقول ياريتني ارجع زي ماكنت وانا صغيرة همي الوحيد كتابي استمتع به

وان شاء الله بكرة ابدأ ويجي البكرة ولا نبدأ..ويطوووول التسويف

لكني في نهاية السنة الماضية وبالتحديد بعد اخر اختبار في سنة رابعة

قررت استمتع باجازتي بالطووول والعرض

والزمت نفسي بعدد من القرارات وحطيتها هنا عشان الزم نفسي اني احققها

بعد ما كتبت قراراتي للاستمتاع بالاجازة

كان عندي وقت فااااضي طول فترة بقائنا في جدة

الانترنت طبعا مافي الا بالعافية

مرت بي ليالي..افكر..اش هدفي في الحياة

طب ما انا خلاص اتقرر مصيري في كلية الطب

خلاص حاتخرج دكتورة... واكمل حياتي كدة وبعدها اتزوج وانتبه لعيلتي...

من جد..!! هل فعلا هذا الي اتمنى تكون حياتي عليه

لا ابدا

لطالما احببت التدريس وان اكون المدربة المشهورة

من بعد اول دورة في التنمية البشرية اخذتها...

كان التطوير الذاتي والتنمية البشرية كل الي افكر فيه

واتمنيييييت اكون مدربة مشهورة ومؤثرة في حياة الناس للأفضل

لكن تمر بعدها فترات الواحد ينشغل بالدراسة وبالحياة وينسى اش كان يقول وينطفي داك الحماس

الشهر الماضي..اتفرغت تماما لكتابة اهدافي

وكان الفضل في ذلك بعد الله سبحانه للدكتور خالد ابو الشامات

معلمي وقدوتي الفاضل

نزلت مكتبة جرير

اشتريت كتب رااائعة يااما كانت قدامي ومافكرت فيها لان ما كان عندي وقت للقراية

رجعت البيت

وبدأت تطبيق خطتي الجديدة لحياتي

وكانت البداية كللللها..

هدف وقرار

علقت لوحة اهدافي فوق راسي

كتبت خطتي لهذا الشهر وللشهر الي بعده وللسنة كلها!!

صارت عندي الثانية لها اهميتها!!

ما اخفيكم ياجماعة

اشياااااء كثييييييييييييييييييييييييييييييرة كان نفسي احققها في حياتي

على مدى 5 سنين مضت

ولا حركت فيهم شعرة

انجزتها بفضل الله تعالي في 3 اسابيع الحمدلله!!!

ماشاء الله

كيف...!!!

If you can see it... You CAN Achivev it!!!

اتغيرت حياتي الحمدلله والبيت كله صار يبغى يغير كمان

البعض من حولي لاحظ هذا التغيير والبعض لسه

لكني واثقة ان صاحباتي الحقيقيين راح يقدروا هذا التغيير

واتمنى اني اساعدهم كمان ينجزوا في حياتهم الكثير

وحبيت اخبركم بشيء من اهدافي المستقبلية

باذن الله تعالى راح اكمل مسيرتي في كلية الطب

وحاكون عميدة كلية الطب الأولى

وشخصية مشهورة ومؤثرة في الناس للأفضل

ومدربة معتمدة من المركز الكندي للتنمية البشرية

باذن الله تعالى

راح اواظب على تحقيق اهدافي واسعى لها بكل الطرق

واتحدى كل من يقف في طريقي ساتجاوزه بعون الله

دي حياتي وانا الي اقرر اش ابغى اسوي فيها
.........................................

الان جا دورك ودورها!!

خذ ورقة وقلم...اجلس في مكان هادئ لوحدك

غمض عينك..اش متخيل نفسك

اش تبغى تكون بعد 20 سنة ..احلم الحلم ببلاش

هل الحال الي انت الان عايشه حيوصلك لحلمك دا

حيوصلك لحلمك انك تبني الفيلا ولا العمارة

حتشتري السيارة ولا تصير مشهووور

لا!!

اش مستني افتح عينك

واكتب قراراتك الجديدة

اكتب اهدافك لحياتك

الاهداف بلا كتابة مجرد امنية وشيء جميل
اما الاهداف المكتوبة فهي الحقيقية!!

يقول براين ترايسي في كتابه فلسفة تحقيق الاهداف<<بالقلم والورقة يبدأ كل شيء

علق اهدافك مام عينيك

احتفظ بها حتى في محفظتك

ولاتخاف من الي حولك..الاصحاب الحقيقيين حيهتموا لك ويدفعوك لقدام

وانت اكيد حتساعدهم بالمقابل..مجرد كونك بتخطط لحياتك

دا راح يحرك فيهم شي انهم هم كمان محتاجين يبدأو

وابدأ بتغيير حياتك من اجل هذه الاهداف

كلنا نقدر..بس انت اكتب..علق..قرر ..ابدأ التغيير

وان شاء الله ما حتلاقي نفسك في يوم((طفشان) او ((قرف الحياة طفش!!)) عارف ليش

لان عندك هدف عندك قيمة لحياتك الي عايشها

وحتستمتع بكل لحظة تقضيها في تحقيق هذا الهدف

استعن بالله وادعم نفسك باشياء تعينك

اقرأ كتب و استمع لمحاضرات في التخطيط وتحقيق الاهداف

ماتقدر تنظم وقتك اقرا واسمع اشرطة عن تنظيم الوقت

وترا رمضان افضل فرصة للتغييييير

اليكم بعض الكتب الي انصح وبقوووووة بقرائتها

كتيبات صغيرة لاتتجاوز ال100 صفحة للي ما يحبو القراءة^.^

اول واهم كتيب:

سيطر على حياتك..للدكتور ابراهيم الفقي

وكتاب:

من الذي حرك قطعة الجبن الخاصة بي.. سبنسر جونسون

دي اخر كتب قرأتها وبالفعل اثرت في بشكل كبير

اسأل الله ان يبارك لنا في ايامنا واوقاتنا ويحقق لكل منا سؤله وهدفه

فالله نعم المولى ونعم المعين